Lidun News (Dili)-Ministeriu Juventude Desportu Arte no Kultura (MJDAK) anunsia rejultadu rekrutamentu Akademia Futebol juvenil ba tinan 2025 selesionadu hamutuk 510, mane 360 no feto 150 hodi partisipa iha akademia Futebol juvenil iha 2025.
Project Leader (KOICA PMC), Chanyoung Park, orgullu anunsia ba rezultadu rekrutamentu ba akademia Futeból ne’ebé tinan ida ne’e, no kandidatu ba akademia Futebol hamutuk 1500, alende ne’e apresia mós ba Ministeriu Juventude Desportu Arte no Kultura (MJDAK) ne’ebé apoiu durante rejistrasaun ba akademia Futebol.
“Ha’u kontente tebes atu fó sai katak ami remata ona ho susesu rekrutamentu partisipante akademia Futeból nian ba tinan ida ne’e liu fali ida ne’e ha’u apresia tebes partisipante ida-idak, kandidatu sira no sira nia inan-aman, tutela sira no liliu ami nia parte interese principal MJDAK. Tanba sira hatudu ona mai ami kooperasaun ne’ebé ativu tebes no apoiu ne’ebé furak durante períodu rejistu nian, entaun obrigadu ba sira nia asisténsia, tinan ida ne’e ami halibur ona kandidatu liu 1,500.” dehan Project Leader (KOICA PMC), Chanyoung Park iha kampu Futebol Becora, tersa (25/03).
Entretantu ba rekrutamentu ne’ebé selesionadu hodi partisipa iha akademia Futeból hamutuk na’in 510 kompostu husi mane na’in 360 no feto na’in 150.
“Maibé entre sira ami sei hili partisipante na’in 510, kandidatu susesu sira iha totál, mane na’in 360 no feto na’in 150. Ami iha kritériu se mak uluk nia mak hetan no fo prioridade ba estudantes anterior, ho razaun hare ba sustentabilidade no edukasaun ne’ebé diak no qualidade, tan ne’e simu nafatin estudantes anterior ne’ebé mak rejistu ona”nia informa.
Kandidatu ne’ebé selesionadu ona iha 7 Abríl parte ekipa sei kontaktu individu ne’ebé sai ona selesaun ba akademia Futeból ne’e.
“Ida ne’e importante entaun la kleur tan ami sei kontaktu individuál ba de’it kandidatu sira ne’ebé susesu hahú husi 7 Abril ba semana ida.”
Diretor Geral Desportu, João Maria Rodrigues, afirma kontrata treinador kompetensia husi Ministeriu nian ne’ebé kooperasaun husi PMC no KOICA sira ho instituisaun rua halo kooperasaun, no hein prosesu reabertura foun iha 8 Abril, komesa iha 28 Abril la’o ona.
“Kontratu ba treinador ne’e responsavel husi parte ministeriu nian, tanba ne’e mak kooperasaun servisu ida ne’ebé kooperasaun ida ne’ebé mak husi parte PMC no KOICA halo depois mak parte governu halo tanba ne’e mak ami koopera ho instituisaun rua ne’e halo di’ak teb-tebes, informa tiha ona katak reabertura ka prosesu treinamentu foun sei halo kontaktu iha dia 8 de Abríl no mós inisiu 28 Abríl ita bele la’o ho di’ak.” nia haktuir.
Alende iha númeru ne’ebé 1500 ne’e la’ós hotu-hotu hetan opurtunidade maibé tinan oin sei iha opurtunidade ba sira hodi tu’ir nune’e frazilidade ba tinan oin ba kampu sira ne’ebé hahu halo konstrusaun remata hafoin akumula jogador juvenil iha fatin refere.
“Ohin ita rona 1500 pessoas, quer dizer la’ós hot-hotu ita atu hetan opurtunidade maibé opurtunidade tinan oin mós ita sei halo nafatin opurtunidade ba labarik sira inklui mós iha tinan oin karik fasilidade di’ak ona por ezemplu kampu bintang mós ita iha, hein katak tinan oin mós bele di’ak ona, kampu alor mós di’ak, kampu Comoro mós di’ak, entaun bele akumula foti ita nia labarik sira ne’ebé rejista, tanba agora konsentra iha Becora.
Mas futuru mai iha Kampung Alor mós ita iha kampu binta mós ita iha Comoro mós ita iha entaun komesa ita fahe ona labarik sira la mai hothotu konsentra iha Becora maibé fatin seluk, ohin 1500 ne’e ita bele konsentra iha fatin ne’ebé ita iha.”
Kandidatu 1500 ne’e husi munisípiu Dili, maibé MJDAK mós sei halo rekrutamentu ba kada munisípiu hotu-hotu hodi partisipa ba jogu juvenil akademia Futeból ne’e.
Jornalista : Perre
